Manarimaan a maipatpatungpal ti Business one-stop-shop iti siudad ti Baguio.
Daytoy ket para iti panakapabaro wenno renew dagiti business permit dagiti establishemento iti siudad.
Nupay kasta, sakbay a maipaay ti business permit dagiti negosyante ket kasapulan a dumalan pay dagitoy iti City Health Services Office (CHSO) para iti panaka-aprobar ti sanitation dagitoy.
Iti panakiuman ti Bombo Radyo kenni Dra. Celia Flor Brillantes, City Health Officer iti siudad ti Baguio, kinunana nga iti panakaiproseso dagiti business permit dagiti establishimento ket mangrugi iti sanitation dagitoy tapno masigurado a natalged ti amin nangruna nu kasano a maiproseso ken maidasar dagiti taraon.
Iti baet a mapaspasaran iti atiddog a pila iti City Health Services Office (CHSO) kadagiti sumagmamano a gundaway para iti nadakamat a pakaseknan, agyamyaman ni Dra. Brillantes kenni Mayor Benjamin Magalong gapu iti panangipaayda iti personnel manipud Public Employment Service Office (PESO).
Mapalpalagipan met dagiti amin nga negosyante maipapan iti panangmintinirda iti kinadalus dagiti negosyo dagitoy.//Bombo Mera Pacpacan
