BAGUIO CITY – Nagyaman ti abogado ti tallo nga elders dagiti indigenous peoples (IPs) ditoy siudad ti Baguio iti panangibasura ti City Prosecutor’s Office kadagiti kaso nga impila ni Indigenous Peoples Mandatory Representative (IPMR) Roger Sinot kontra kadagitoy.
Sigun kenni Atty. Jingboy Atonen, nakita ti korte nga awan ti umno a basaran dagiti kaso nga impila ni Sinot kas panagaramat ti napeke a dokumento, perjury ken saan a nainkalintegan a panagaramat ti publication ken saan a nainkalintegan a waragawag.
Nagbalin a respondent kadagiti nasao a kaso da Atty. Manuel Cuilan, Paul Pasigon ken Joseph Sacley nga immunan a nangipila iti kaso kontra kenni Sinot tapnu saan daytoy nga agtugaw kas IPMR ti Baguio.
Kinuna ni Atty. Atonen a babaen iti daytoy ket tarigagayda nga agsarak ti kampo ti dua a benneg babaen iti panakiballaet ti National Commission on Indigenous Peoples (NCIP) – Cordillera tapnu mapagsaritaan ti isyu ken mabukel ti settlement.
Nupay kasta, ur-urayenda paylaeng ti aksion wenno panangipaayab ti ahensia iti dua a kampo para iti kaskenan nga addang.
Maipalagip a manipud iti Philippine Mediation Center ket naisubli manen iti NCIP-Cordillera ti panakarisut ti isyu, tallo a bulan ti napalabas.
Mangnamnama pay ti abogado nga iti umno a panawen ket marisut ti isyu tapnu maaramid metten ti settlement a maisumitir iti korte para iti kaskenan a panakadesisyon ti kaso.
