Kiddaw dagiti nagduduma a kooperatiba dagiti jeepneys iti pagilian ti umno a panakaadal ti maipapan iti Public Utility Vehicle (PUV) Modernization Program a pakairamanan ti implementasyon daytoy.
Iti panakiuman ti Bombo Radyo kenni Patricio Evangelista, dadaulo ti Liga ng Transportasyon at Operators sa Pilipinas (LTOP) ti Cordillera ken Region 1, mangnamnamada a naannayas ti panakaitaray wenno panakaimaton ti Public Utility Vehicle (PUV) Modernization Program kadagiti kooperatiba ken entities gapu ta adda dagiti sumagmamano nga indibidual a mangsamsamantala iti daytoy.
Sigun kenni Evangelista, dawatda iti gobyerno nga isuroda kadagitoy no kasano ti panangmanehar kadagiti kooperatiba ken kiddawda a daytoy a programa ket convenient, affordable, ken natalged kadagiti pasaheros.
Impakaammo pay ni Evangelista nga awan ti planoda nga umapela manen para iti panakailaylayon ti consolidation agsipud ta dumanon iti siyam a daras a nailaylayonen ti Public Utility Vehicle (PUV) Modernization Program.
Kinuna pay ti dadaulo ti Liga ng Transportasyon at Operators sa Pilipinas (LTOP) a panawenen tapno adda nga ag-abante ti nasao a programa tapno ditoy a maamoan ken masukimat no kasano ka-epektibo daytoy.
Kabayatanna, idi ngudo ti napalabas a bulan ket ado dagiti jeepney draybers ken operators nga inhabolda nga inconsolidate nangruna ket maklasipikar kas “colorum” dagiti saan a makonsolidate.//M
