Kinumpirmar ti Malacañang nga awan ti Pilipino a naapektaran iti napasamak a panaglayus iti Kerr county sadiay Texas.
Sigun kenni Palace Press Officer Claire Castro, awan iti agdama ti naawatda nga impormasion iti Philippine Consulate seknan kadagiti Pilipino a naapektaran iti nasao a panaglayus, a nangitunda iti ipupusay dagiti agarup 100 a tattao.
Nupay kasta, agtultuloy ti pannakikoordinar ti Philippine Consulate kadagiti Filipino community sadiay Texas.
Imbilin metlaeng ni Castro a mabalin a tumawag dagiti Pilipino sadiay Texas iti nasao nga ahensia, tapno agkiddawda iti tulong ti gobierno.
Innayon daytoy a nakasagana ti gobierno ti Pilipinas a tumulong ken mangasistar kadagiti nationals nga agkasapulan iti tulong.
Maipalagip a dumanon iti 100 dagiti pimmusay iti nasao nga insidente no sadino, agtultuloy a maipatpatungpal ti rescue operations para iti pannakasapol dagiti mapukpukaw.
