Naawaten ti Baguio City ti Php8 million a cash prize daytoy iti 2023 Batang Pinoy ken Philippine National Games.
Iti panakiuman ti Bombo Radyo kenni Engr. Bonifacio Dela Peña, City Administrator iti Baguio City, kinunana a kalpasan ti mano a tawen ket impaayen ti Philippine Sports Commission ti nabayagen a maur-uray a cash prize iti lokal a gobyerno ti siudad.
Inawat daytoy da Assistant City Administrator Vittorio Jerico Cawis ken City Sports and Development Officer Gaudencio Gonzales bayat ti napasamak a turn-over program idi Miyerkules idiay Metro Manila.
Ti Php8 million a cash prize ket buklen ti Php5 million manipud iti panagbalin a kampeon ti siudad iti Batang Pinoy bayat a ti Php3 million ket nagtaud met iti panagbalin ti siudad kas 2nd runner-up iti Philippine National Games idi 2023.
Sigun kenni Engr. Dela Peña,maaramat amin ti Php8 million para iti panakagatang dagiti nagduduma nga sports equipment para metlaeng kadagiti atleta kasta met ti panakatarimaan iti Baguio Athletic Bowl.
Inlawlawag ni Engr. Dela Peña a nainget ti panagmonitor ti Philippine Sports Commission iti panakaaramat dagiti cash prize para iti panakatarimaan dagiti sports infrastracture ken facilities ken ti panakagatang dagiti sports equipments.
Kabayatanna, mangnamnama met ni Engr. Dela Peña nga iti kabiitan a panawen ket maipaay metlaeng ti cash prize a napangabakan iti siudad kas 2nd place iti napasamak a Batang Pinoy 2024 ken saanen a maitantan agingga inton sumaruno a tawen.//Bombo Mera Pacpacan
