BAGUIO CITY – Binalakadan ni Communications Operations Office Assistant Secretary Ana Marie Banaag dagiti umili ti Bauko, Mt. Province a mantinirenda ti napintas a kaugalian ti nasao a munisipyo.
Kinunana a ti ‘begnas’ wenno panagyaman iti Namarsua ket maysa a napintas nga ugali iti kaigorotan a napintas a mamantinir uray nu bassit laeng a parabor ti maaw-awat dagiti tattao.
Naragsakan met daytoy iti nakitana a panagkaykaysa dagiti umili sadiay, saan a kas iti dadduma a munisipyo a dagiti laeng babbaket ken lallakay ti mabatbati para iti selebrasyon.
Kagiddan iti daytoy ket ginuyugoyna dagiti tubo ti Bauko nga agawidda ken makipagrambakda iti ‘Begnas di Bauko.’
Addaan ti festividad iti tema a “Gabay di esek, sikan di ipogaw, bikas di umili, katagtaguan di sasayangdan.”
Ti ‘begnas’ ket kultura ti panagyaman kadagiti kankana-ey ti Bauko a tinawen a maramrambakan tapnu pagyamananda ni Kabunyan ken ti ispiritu dagiti allapo kagiddan ti panagkiddawda iti parabor mainaig iti socio-economic ken political concerns ti komunidad.
Agserbi ti selebrasyon saan laeng a para iti panagragragsak ngem ketdi, kas tali a mangpatibker iti munisipyo para iti panagkaykaysa dagitoy.
