BAGUIO CITY – Dumanonen iti 98 a porsiento kadagiti 1,330 a personnel ti Baguio City Police Office (BCPO) ti nabakunaan kontra iti COVID-19.
Iti interview ti Bombo Radyo Baguio, kinuna ni PLt.Col Judy Jasmin Palicos, dadaulo ti City Community Affairs Development Unit ti BCPO a ti dua a porsiento a nabatbati ket dagiti masikog a pulis ken dagiti addaan ti medical certificate a saanda paylaeng a mabalin a mabakunaan.
Maibasar iti rekord, 1,227 ti nakakompleto iti bakunada kontra iti COVID-19 bayat a 74 ti nakaawat iti first dose.
Inlawlawag met ti dadaulo ti BCPO nga inkagumaanda a mabakunaanen dagiti pulis iti siudad nangruna ta dagitoy ti kanayon a makipulpulapol kadagiti tattao, partikular kadagiti checkpoints.
Impannakkel pay ti BCPO nga awan kadagiti personnel daytoy ti naka-quarantine gapu iti COVID-19 kagiddan ti nainget a pammilin para iti panagtulnog dagiti pulis ti siudad kadagiti health protocols tapnu awan ti maimpeksion kadagitoy kabayatan ti panagaramidda iti mandato dagitoy.
