Agkidkidaw dagiti print media iti kanayonan a suporta manipud iti publiko tapno saan nga agrikep dagitoy.
Sigun kenni Thom Picaña, presidente ti Baguio Correspondents and Broadcasters Club (BCBC) ken maysa metlaeng a kameng ti print media, nupay addan dagiti advance technology a mabalin a pagbasaan wenno pagdenggan iti damdamag ket kidkiddawenda latta ti suporta ti publiko kadakuada nga adda iti print media .
Maibasar iti datus, pito laengen a print media wenno newspaper ti nabatbati iti rehiyon Cordillera kalpasan a nagrikep ti Baguio Midland Courier.
Impeksa ni Picaña nga adu ti proseso a pagdalanan ti maysa a print media agsipud ta masapul nga i-check wenno i-correct dagiti editors sakbay a maimprinta ken mairuar iti publiko.
Maipalagip nga idi Hulyo ket nagrikep ti Baguio Midland Courier, maysa a print media iti Baguio City gapu ta manmanon dagiti aggatgatang nga umili.
Inaklon ti nasao nga opisyal nga ita a panawen ket mabalin a mabasa wenno mangngeg dagiti nagduduma nga impormasyon iti social media.
Gapu iti daytoy, ado metten a radio stations ti mangpaspasayaat pay iti operasyonda babaen iti digital broadcasting tapno mamintinar ti ratings dagitoy.
Iti baet dagiti ado a panagbalbaliw, impeksa ni Picaña a saan koma a rumbeng a lipaten dagiti dadduma a mainstream wenno traditional media gapu ta dagitoy ti maysa kadagiti mangbukbukel iti pakasaritaan ti Pilipinas.//Bombo Noveh Organo
