Impasigurado manen ti lokal a gobierno ti siudad ti Baguio a risutenda ti pakaseknan iti “spaghetti wire” wenno naka-uy-oy a kable.
Sigun kenni Daryl Longid, hepe iti Public Order and Safety Division (POSD), makikikoordinarda iti nagduduma nga opisina ken telecommunications company tapno iyurnos ti nasao nga isyu.
Impeksa ni Longid a nagtaud ti problema iti dekada a nabaybay-an a linia ken agtultuloy a baro nga installation, isu’t gapuna a mabusbosna ti attidog a panawen sakbay a marisut daytoy.
Nakapokus ita ti POSD iti Central Bussiness District, ngem mapatta-patta a lima agingga 10 a porsiento laeng dagiti nakasabit a kable iti 128 barangay ti naaksyunan.
Maipalagip nga idi napalabas a tawen, insingasing ni Baguio City Councilor Vladimir Cayabas ti “Anti-Dangling Wire Ordinance” a panggepna a salakniban ti biag, maliklikan ti aksidente ken mapasayaat ti siudad babaen iti panagikkat iti delikado a nakasabit a kable.
