LA TRINIDAD, BENGUET – Pakaseknan ita dagiti sumagmamano a mannursuro nangruna dagiti job order ken contractual iti Benguet State University idiay La Trinidad, Benguet ti nabayag a pannakaipaay ti sweldo dagitoy.
Maibasar iti report a naawat ti Bombo Radyo, adda dagiti sumagmamano nga empleyado a saan a nakaawat ti sweldona idi pay Enero ti agdama a tawen.
Iti met interview ti Bombo Radyo, inlawlawag ni Dr. Felipe Comila, Presidente ti nadakamat nga unibersidad, kasapulan pay a maiproseso ti pundo ken dagiti requirements sakbay a maipaay ti sweldo dagiti mannursuro.
Gapu iti daytoy, kidkiddawen ni Comila ti pannakaawat ken panaganus pay dagiti mannursuro nangruna dagiti baro nga empleyado.
Impanamnama met ti nasao nga opisyal a maipaay a dagus ti sweldo dagiti mannursuro iti kabiitan a panawen gapu ta nagtataripnong dagitoy kadwana ti Board of Regents para iti pannakarisut ti nasao a pakaseknan.
Sigun pay kenni Comila, agturong daytoy idiay Metro Manila inton lunes, Pebrero baente sais, para iti pannakaaprubar ti kiddaw dagitoy a pundo.
Impasigurado ni Comila nga apaman a mapatgan ti pundo ket maipaay a dagus ti sweldo dagiti mannursuro inton Pebrero baente siyete.
Maibasar iti rekord ti Benguet State University, nasurok sangagasut a mannursuro ti agtrabtrabaho iti main campus daytoy idiay La Trinidad, Benguet.//Benjo Guzman
