BAGUIO CITY – Ipampannakkel ti lokal a gobyerno ti Mountain Province a dumanonen iti 50 dagiti centenarians ti probinsia a nabigbig ken naipaayan dagitoy iti pammadayaw manipud nangrugi ti provincial centenarian awards program idi 2015.
Sigun kenni Governor Bonifacio Lacwasan Jr., kaudian kadagiti nasao a centenarians a nabigbig dagitoy ket da Juana Nay-osan ti Demang, Sadanga; Viviana Mangaccam ti Antadao, Sagada; Patrick Bawing ti Patay, Sagada; Agrifina Aligid ti Batayan, Tadian ken ni Mowan Laop ti Mayag, Bauko.
Maibasar met iti datus ti Provincial Social Welfare and Development Office ti Mountain Province, ti munisipyo ti Paracelis ti nakailista iti kaaduan a centenarians a dimmanon iti 11 bayat a ti laeng munisipyo ti Barlig ti awanan ti nailista a centenarian.
Kagiddan iti daytoy, inyapela ti lokal a gobyerno ti Montañosa ti panangtaripato ken panangsalwad dagiti kapamilya dagiti centenarians kadagitoy manipud iti aniaman a kita ti panagabuso.
Sagudayen ti Provincial Ordinance No. 315, series of 2018 a tunggal centenarian sadiay Mountain Province ket makaawat iti P30,000 ken certificate a panangbigbig iti daytoy.
Maipalagip nga iti Republic Act No. 10868 wenno Centenarians Act of 2016 ket ipaayan ti nasyonal a gobyerno iti P100,000 ti tunggal senior citizen a makadanun iti tawen a sangagasut.
