Maysa a karit iti panakaipatungpal iti humanitarian operation idiay Myanmar iti agdama dagiti nadadael a kalsada ken imprastraktura nga intuda iti dimmalapos a 7.7 magnitude a gingined idi laeng Biernes.
Sigun iti UN Office for the Coordination of Humanitarian Affairs (OCHA),narigat a maakses dagiti kangrunaan a pagdalanan tapno maaramid iti humanitarian operation kas iti nadadael a Yangon-Nay Pyi Taw-Mandalay expressway.
Malaksid kadagiti kalsada,marigatan metlaeng dagiti pagagasan iti central ken northwestern Myanmar a mang-akomodar kadagiti nadangran nga indibidwal gapu iti nasao a gingined.
Ita nga aldaw ket naituding a dumanon dagiti sangapulo ket pito a cargo trucks a naglaon kadagiti shelter ken medical supplies tapno temporaryo a marisut ti kinakurang iti agas iti agdama pakairamanan dagiti blood bags ken anaesthetics.
