“Makikita talagang pinagkaperahan”
Impetteng ni Mayor Benjamin Magalong a napagkuwartaan laeng ti kalsada idiay Legarda Road no sadino nagbalinen a lubak-lubak daytoy gapu iti agtultuloy a panagbayakabak iti tudo.
Sigun kenni Mayor Magalong, nalabit pinaspasan ken inhabolda laeng ti pannaka-espalto sakbay ken kalpasan iti eleksyon gapu ta masayangan dagiti involved ti proyekto iti porsyento a maala isunga nalabit insangsangbutda laeng ti nasao a proyekto nga asphalt overlay.
Impeksa pay ni Mayor Magalong a saan laeng nga idiay Legarda Road ti kastuy ti sitwasyon na nu diket pakairamanan dagiti dadduma a paset ti kalsada idiay Abanao no sadino idi napalabas laeng a tawen a naespaltuan daytoy ngem nadadael metlaeng a dagos.
Kabayatanna, iti eksklusibo a pannakiuman ti Bombo Newsteam kenni Teodoro Castro , Barangay Chairman ti Barangay Burnham-Legarda, Baguio City, naituding a matarimaan ti nasao a kalsada iti kabiitan a panawen.
Impeksa ni Castro a naaddaan dagitoyen ti meeting iti Department of Public Works and Highways (DPWH) ken dadduma a maseknan para iti pannakatarimaan ti kalsada no sadino mailepleppas laengen ti bidding ken program of works. Kalpasan dagitoy, marugyanen ti rehabilitasyon ti nasao a kalsada.
Innayon pay daytoy a manipud Parkway agingga Palace Hotel ti naituding a marehabilitate ngem nupay kasta, nalabit a posible a maextend daytoy depende iti assessment ti DPWH iti damage dagiti dadduma a kalsada.
Kinuna pay daytoy a nasken metlaengen a marehabilitate ti kalsada tapno maliklikan ti aksidente nangruna kadagiti motor.
Kinidaw met daytoy ti pannakaawat ken anos manipud iti publiko ken urayen nu kaaano a marugyan ti nasao a proyekto.
Inlawlawag met daytoy nga ita laeng a kastoy kagrabe ti dadael ti kalsada no sadino maysa kadagiti nangpakaro ket ti agtultuloy a panagtudtudona.