Impablaak ti Department of Agriculture a dumanon iti P6 Billion ti nadadael iti sektor ti agricultura gapu iti epekto ti El Niño a mapaspasaran ita iti pagilian.
Nupay kasta, kinuna ni Arnel de Mesa, panakangiwat ti Department of Agriculture a nababba daytoy a balor ti nadadael, no idilig iti ninamnama dagitoy a danyos.
Sigun iti nasao nga opisial, ninamnama dagitoy a madadael ti 120,000 hectares iti crops, nupay kasta dumanon iti 60,000 hectares ti nadadael iti agdama.
Kabayatanna, maibasar iti datos ti nasao nga ahensia, nailista ti MIMAROPA Region kas kadakkelan ti nadadael iti agrikultura a dumanon iti P1.7 Billion, sinaruno ti Western Visayas a P1.5 Billion ken ti Cordillera Adminitrative Region a dumanon iti agarup P800 Million, no sadino kangrunaan a nadadael ti pagay, Mais ken high-value crops.
