Dumanon iti P689.66 million ti nadadael iti sektor ti agrikultura gapu iti epekto ti bagyo a Luis, Maymay ken habagat iti pagilian.
Maibasar iti kaudian a datos ti Department of Agriculture (DA) idi Agosto 13, ngimmato daytoy manipud iti P347.37 million.
Iti nasao a datos, dumanon iti 21,115 a mannalun ti paktado sadiay Ilocos Region, Cagayan Valley, Central Luzon, Calabarzon, Mimaropa ken Western Visayas.
Sigun iti DA, dumanon iti nasurok 17,000 metriko tonelada a farm produce ken nasurok 19,000 nga ektaria a talon ti nadadael.
Kangrunaan a naapektaran ti pagay, mais, saba, high value crops, livestock, poultry, agricultural infrastructures, machineries ken equipment.
Namnamaen ti sektor ti agrikultura a ngumato ti nasao a datos bayat nga agtultuloy ti damage assessment ken validation kadagiti naapektaran a rehion iti pagilian.