Agpatpataming itan dagiti nadangran iti insidente a pannakatnag ti maysa nga L300 van idiay Parapad, North Sanitary Camp, Baguio City idi kalman.
Maibasar kadagiti pannakiuman ti pulisya iti driver ti lugan, kinuna a pasang-atda iti kalsada idi naawanan daytoy ti kontrol ti lugan.
Kellaat a nagsardeng ti lugan ken nagsanud daytoy.
Impadas nga imaneho ti driver ti lugan ngem limmabes daytoy ti kurbada, rason a natnag daytoy iti lote ken bimmaliktad.
Nadangran ti lima nga indibidual manipod kadagiti walo a karga ti lugan pakairamanan ti sisentay tres anyos a babai, bente otso anyos a babai, bente dos anyos a babai, kuatro anyos nga ubing a lalaki, ken ti maladaga a naideklara kas dead on arrival.
Dagiti met tallo pay a pasahero ket adda iti nasayaat a kasasaad.
Sigun iti pannakiuman ti Bombo Radyo iti kameng ti Police Station 2, kinunana a grupo dagitoy ti local a turista nga agkakapamilya ken agaam-ammu a manipod idiay Bicol region ken Pangasinan.
Naggapuda iti La Trinidad, Benguet ken paturong kuma iti Mines View Park iti siudad ti Baguio idi napasamak ti insidente.