Ita panawen ti Holy Week, impeksa ni Emilia Balanon, maysa a Barangay Pastoral Council President sadiay La Union a daytoy ket naituding tapno intay makipagrikna iti napadasan ni Hesu Kristo a pannakadusa.
Iti panakiuman ti Bombo Radyo kenni Balanon, kinunana a panawen daytoy tapno lagipen tayu no kasano a nailansa ni Kristo para iti panakaisalakan ti sangalubongan.
Gapu iti dayta, rumbeng nga un-unaen tayu ti kaipapanan ti naespirituan a panagbiag ken saan a daytoy maipapan iti nailubongan a banbanag.
Sigun kenni Balanon, daytoy ti panawen tapno agturong dagiti tattao iti simbaan, ti agkararag ken tay tumulong kadagiti agkasapulan nangruna dagiti masakit, dagiti nakabalud, dagiti natataengan ken daduma pay.
Kinuna ni Balanon a rumbeng met a liklikan ti panagbalin a naariwawa la unay, bawasan ti nagarbo a selebrasyon ken liklikan ti panag-igem kadagiti natatadem a banbanag gapu ta saan a daytoy a panawen ti panagragsak no di ket panawen nga intay makipagrikna.
Saan met a maliklikan a daytoy a holy week ket agbalin a bonding wenno bakasyon nu pay kasta kasapulan a kitaen tayu nga un-unaen tayu ti relasyon tayu iti Diyos sakbay ti amin.//Mira
