Posible sumango iti kaso dagiti nagannak dagiti pito nga estudyante ti Pinget National High School a karaman iti bullying incident.
Inlawlawag ni PCol. Ruel Tagel, City Director ti Baguio City Police Office nga ada pay ti lima a kanayunan a respondents no sadino, dagitoy dagiti maatap a nagvideo ken nangbuybuya iti panangdangran ti pito nga estudyante iti biktima ngem dagitoy ket posible a maipaaayan ti umno nga intervention wenno disiplinary action base iti partisipasyonda iti napsamak a bullying.
Nupay kasta, sigun iti City Legal Office, gapu ta menor de edad dagitoy, dagiti nagannakda ti sumango iti kaso.
Sigun iti representative manipud iti City Legal Office, posible a sumango dagiti nagannak iti civil case gapu iti damage ken mabalin metlaeng a makasuan dagitoy iti cyber libel.
Innayon met ni PCol. Tagel a maur-uray laengen ti desisyon ti pamilya ti biktima.
Kabayatanna, kiddaw dagiti elders ken komunidad ti Kalinga a dimmar-ay iti case conference, ‘expulsion’ kuma ti mapasamak kadagiti respondents.
Inlawlawag met ti pagadalan kasta metlaeng ti maysa nga abogado ken maysa a representative manipud iti Schools Division iti siudad a saan a pinal ti 5-days suspension nga impaay ti pagadalan a pannusa kadagiti respondents ken initial laeng daytoy.
Innayon pay ni Johnny Kidian, principal ti Pinget National High School a saan laeng nga isuna ti nagdesisyon iti daytoy nu diket karaman ti Child Protection Committee a bukbuklen ti City Social Welfare and Development, Baguio City Police Office, Barangay ken dadduma pay.
Kabayatanna, impeksa met ni Mayor Benjamin Magalong a mabalin a maaddaan iti appeal iti 5 days suspension nga immuna a desisyon ti pagadalan, kayatna a sawen , apaman a maipresenta dagiti ebidensya nga iparang iti kapulisan, CSWDO, ken ti video a naipablaak iti social media kasta metlaeng ti testimonya ti ubbing, dita metten nga agdesisyon ti Child Protection Committee.
Iti sabalin a bangir, pinaglibakan met ti Baguio City Police Office ti sayangguseng nga adda ti kabagyan a pulis dagiti respondents, rason tapno bimmuntog ti imbestigasyon. Impanamnama met ti kapulisan a patas ti panagimbestiga dagitoy.
Ti case conference ken nangrugi idi alas-dos ti malem ken nagleppas iti pasado alas-4 ti malem. Indauloan daytoy ni Mayor Benjamin Magalong ken naipatungpal idiay Multipurpose Hall ti City Hall. Dimmar-ay met dagiti umili ti Kalinga nangnangruna dagiti panglakayen dagitoy, ti biktima ken ti inana, Baguio City Police Office, City Social Welfare Development Office, Department of Education, City Administrators Office, City Legal Office, Mental Health Unit, abogado ken daduma pay. // via Bombo Noveh Organo
