--Ads--
Dumanon iti 539 a pamilya dagiti biktima ti extrajudicial killings (EJK) ti nagaplikar kas “participating victims” iti kaso kontra kenni sigud a President Rodrigo Duterte iti International Criminal Court (ICC).
Panggepda nga idanun ti kapanunutanda iti pannakausig ti kaso.
Sigun kenni ICC Assistant to Counsel Atty. Maria Kristina Conti, saan a kasapulan nga agtestigo ti participating victims iti korte agsipudta, naisina dagitoy kadagiti agtestigo a pilien ti Prosecution ken Defense.
Saklawen laeng ti kaso dagiti insidente manipud Nobyembre 2011 agingga Marso 2019.
Sigun pay kenni Conti, posible nga ipaay ti ICC ti konsiderasyon kenni Duterte, karaman ti pannakipasetna iti panagdengngeg babaen iti video call.
