BAGUIO CITY – Impetteng ni Atty. Victor Singa Jr. a ti panaganus ken ti kinalaing nga agdiskarte iti nasayaat a wagas ti tulbek iti panagballigi iti aniaman a karera iti biag.
Nagbalin a komentona daytoy kalpasan a nairaman ti naganna kadagiti nakapasa iti 2016 BAR Examination.
Sigun kenkuana, saan a maliklikan ti panagnerbiyos ken panagdanag no awan ti suporta manipud iti pamilya, pagadalan ken gagayyem kabayatan ti ‘review’ ken iti mismo a panagawen ti eksaminasyon.
Inaklonna a narigatan daytoy iti panagadalna iti Bachelor of Laws iti Cordillera Career Development College nangruna ta ti immuna nga inturposna ket Bachelor of Science in Agriculture.
Nupay kasta, kinunana a ti inaramidna ket kanayon a nagdengdengngeg iti radyo, nagbasa iti news ken nagbuya iti tilibisyon nangruna ta kaaduan a current events dagiti mataltalantan kadagiti dadduma a subjects dagitoy.
Dinakamatna a bayat ti panagadalna iti kina-abogasya iti uneg ti lima a tawen ket nagduduma ti sinerrekna a trabaho tapnu matulongan dagiti nagannakna iti gastosna iti pagadalan iti baet nga adda ti negosyo ti pamilyada ken adda trabaho dagiti naganak daytoy.
Insagot pay ni Atty. Singa Jr. ti kangrunaan a panagyamanna iti pamilya daytoy, iti pagadalanna ken kadagiti gagayyemna iti panagballigi daytoy bayat a panpanunutenna no anya ti sumaruno nga aramiden daytoy.
