BAGUIO CITY – Marambakan ti maika-dua a Cordillera Festival of Festivals iti Baguio City inton Nobyembre 11.
Iti interview ti Bombo Radyo kenni Atty. Brenden Kim Quintos, Legal Officer ti Department of Tourism (DOT) – Cordillera, panggep ti nasao nga okasyon nga iyam-ammo kadagiti turista dagiti nagduduma a festivals ken kultura iti rehiyon.
Dinakamatna a ti laeng Panagbenga Festival ti pamilyar ken buybuyaen dagiti turista gapu ta daytoy laeng ti ammoda a festival iti siyudad.
Imbinsa ni Atty. Quintos a mabuya ti Lapat Festival ti Apayao, Gotad Festival ti Ifugao, Lang-ay Festival ti Mountain Province, Mataguan ken Laga Festival ti Kalinga, Adivay Festival ti Benguet ken ti Panagbenga Festival ti Baguio City.
Manamnama nga agpabuya dagiti tallo pulo agingga lima pulo a performer iti uneg ti sangapulo agingga sangapulo ket lima a minutos iti grand showcase.
Maipatungpal met ti parada inton Nobyembre 11, alas otso ti agsapa agingga alas nuebe ti agsapa iti Upper Session, Baguio City.
Mabuya met ti dua nga Street Dance Performance iti sango ti Porta Vaga Mall ken iti intersection a paapan iti Harrison road agingga iti Rose Garden idiay Burnham Park.//Bombo Rosemarie Bulsao
