Inyebkas ni Police Colonel Francisco Bulwayan Jr., Baguio City Police Office (BCPO) City Director ti panagyaman daytoy kadagiti kameng ti pulis nga adda iti likodan ti balligi a panagsolbarda kadagiti nagduduma a klasen ti krimen iti siudad ti Baguio manipud Enero agingga Abril iti agdama a tawen.
Maibasar iti kaudian a report, 226 kadagiti most wanted persons ket naarestar para kadagiti nagduduma a kaso a pakairamanan ti panagrames, panagtakaw, estafa ken daduma pay.
Kadagiti naarestar, 36 kadagitoy ket nabigbig kas Top Most Wanted Persons no sadino uppat kadagitoy ket iti regional level, 13 iti city level, maysa iti provincial level, tallo iti municipal level ken 15 iti station level.
Kabayatanna, dumanon iti 31 ti naisayangkat nga anti-illegal drugs operations a nakatiliwan dagiti 35 nga indibidual, 15 kadagitoy ket High Value Individuals bayat a 14 kadagitoy ket Street Level Individuals.
Dumanon met iti 23 nga indibidual ti nakemmeg kadagiti naipatungpal nga Anti-illegal gambling operations iti siudad ti Baguio bayat a 39 a loose firearms ti nakumpiskar dagiti otoridad.
Iti panggep ti Baguio City Police Office nga imanehar ti nailet a trapiko iti siudad, nagresulta daytoy iti panakatiliw dagiti 33, 866 a motorista gapu iti panaglabsingda pagannurotan iti kalsada.
Impeksa met ni Bulwayan Jr. a saan dagitoy nga agsardeng iti panang-ingetda pay iti kampanyada tapno agbalin a “worry-less” ti siudad ti Baguio.
