BAGUIO CITY– Dumanon iti 10 a repatriation requests manipud kadagiti kabagian dagiti Cordillera OFWs a pimmusay sadiay Saudi Arabia.
Nupay kasta, kinuna ni Overseas Workers Welfare Administration Cordillera Regional Welfare Office (OWWA) – Cordillera Regional Director Manuela Peña a ti laeng kiddaw para iti panakaiyawid ti bangkay ti OFW a taga-Ifugao ti napatgan.
Kinunana a naisangpet ditoy pagilian ita a lawas ti bangkay daydi Edwin Austria ti Lagawe, Ifugao, a nagtrabaho kas heavy equipment operator sadiay Riyadh kalpasan a pimmusay iti ballasiw taaw gapu iti heart failure ken respiratory arrest idi May 30.
Dinakamatna a karaman ti bangkay ni Austria kadagiti naiyawid ditoy pagilian idi July 19 babaen iti mass repatriation program ti gobyerno.
naipaima met iti biyuda ti OFW ti tulong pinansial a P120,000 a paset ti Social Benefit Package para kadagiti OFWs nga aktibo a miembro ti OWWA.
Innayonna a maipaayan pay iti P15,000 livelihood assistance ken maysa kadagiti anak ni Austria ti mapagbalin nga scholar ti OWWA.
Kabayatanna, iti datus ti OWWA-Cordillera idi July 21, nasurok iti 1,400 nga OFWs ti natulonganda a nagawid iti nagduduma a disso iti rehion babaen iti “Uwian Na” Program para kadagiti returning OFWs.
