BAGUIO CITY – Maituloy ti panakapabaro ken panakapapintas ti merkado publiko ti siudad kasaruno ti panangsuporta iti daytoy dagiti maseknan nga organisasyon.
Nupay kasta, inyunay-unay manen dagiti vendors a saan a rumbeng nga agbalin a kas iti mall ti langa ti merkado publiko gaputa maamakda a bumagsak ti negosyo dagitoy.
Iti panakiuman ti Bombo Radyo Baguio, inlawlawag ni City Administrator Engr. Bonifacio Dela Pena a napili ti SM prime holding incorporated a proponent ti nasao a proyekto rason a mall ti naisumiter a pagbalinan ti mapabaro a merkado publiko.
Nupay kasta, impettengna a saan a naan-anay a naipaay ti Original Proponent Status (OPs) iti nadakamat a proponent gaputa dumalan pay dagitoy iti 34 terms for negotiation.
Kinunana nga iti kanito nga agballigi daytoy a proseso ket maaddaan ti switch challenge nu sadinno mairaman ti merkado publiko kadagiti mabalin a mangisumiter kadagiti requirements.
Inayonna nga iti kanito a mapaay ti uray maysa kadagiti 34 terms of negotiation ket maipatungpal ti sabali manen a wagas malaksid iti switch challenge.
Impasigurado met ni Atty. Zosimo Abratique, Presidente ti BAMARVA ken mangidadaulo iti Public Market, 90% a nakasaganada a lumaban iti swiss challenge gaputa nakasaganan dagiti kaskenan a dokumento ken napintas a proposal nga ipresenta dagitoy.
Impampanakkelna pay nga adu ti mangsupsuporta iti panggepda a maipabiyang ti panakaipasdek ti baro a merkado publiko iti kooperatiba dagitoy tapnu mamintiner latta ti negosyo dagiti vendors sadiay.
Kabayatanna, impaganetget met ni Councilor Philian Louise Weygan-Allan a panawenen tapnu mapabaroan ti merkado publiko isut gapuna a suportaranna ti aniaman a wagas wenno modality a maipatungpal seknan iti rehabilistasyon daytoy.
Impanamnama met ti lokal a gobyerno nga iti kanito a mangabak ti nasao a proponent ket saan a maawanan dagiti lehitimo a vendors iti stalls wenno paglakoan.
