BAGUIO CITY – Agtultuloy ti panakakolektar dagiti basura iti nagduduma a garbage collection areas iti siudad ti Baguio iti baet ti agdama a pandemya.
Iti interview ti Bombo Radyo Baguio, kinuna ni City General Services Office chief Engr. Eugene Buyucan nga iti agdama ket agay-ay-ayam iti 150 agingga 155 a tonelada ti basura ti kadawyan a makolkolektarda iti innaldaw.
Dinakamatna a ti laeng pakaseknanda no mamingsan ket dagiti clean-up drive kadagiti barangay iti siudad a saan a maikoordinar kadakuada gaputa marigatanda bassit no kiddawen dagiti nasao a barangay ti tulongda iti panaka-akop dagiti rugit a naurnong dagitoy kadagiti tributaries.
Innayonna nga adda metten inruarda a pagalagadan iti publiko iti umno a panangibelleng kadagiti hazardous wastes, partikular dagiti naaramaten a personal protective equipment, face mask ken face shield tapnu saan met nga agpeggad dagiti volunteer garbage collectors ken maliklikan ti kontaminasyon.
Impannakel pay ni Engr. Buyucan a nasayaat ti panagtungpal dagiti barangay iti paglintegan iti umno a panangisina-sina kadagiti basura.
Kinunana a nadlawda ti panagkissay iti kaadu dagiti marunrunot a basura a maur-urnong kadagiti garbage collection sites gaputa nasursuro metten dagiti plantito ken plantita ti ag-compost kadagiti food waste tapnu agbalin nga abono dagiti mulada.
Dinakamatna a ti composting ket maysa a probisyon iti linteg tapnu matulongan ti siudad a makainot iti gastos.
