BAGUIO CITY – Nagkedked nga agkomento ni Lualhati Barangay Kapitan Julius Ampal seknan iti reklamo a a dina kayat a mangipaay iti barangay clearance a kidkiddawen dagiti agtagikua iti kabalyo sdiay wright park para iti panaglakoda iti compost wenno abuno a nagtaud kadagiti rugit dagiti kabalyo.
Sigun kenni Punong Barangay Ampal, uryanna ti umno a forum tapno sungbatanna dagiti nasao a reklamo kas panagraemna iti konseho ken kadagiti dadduma pay a maseknan nga opisina.
Innayunna a saan a nakadar-ay daytoy iti panagdenggeg ti konseho seknan iti nasao nga isyu agsipud ta addan ti immuna a naituding a napateg nga aramiden daytoy a saan a mabalin a maitantan.
Nupay kasta, impetteng ti source ti bombo radyo baguio a dagiti agrekreklamo ket saanda nga ibagbagi dagiti dua a kooperatiba dagiti pony boys sadiay wright park.
Malaksid iti dayta, saan a mabalin a maipaayan iti barangay clearance dagiti agrekreklamo agsipud ta saan nga umno ti lugar a paangikarkargaanda kadagiti lakoda nga compost, a saan a nasayaat a kitaen nangruna kadagiti turista.
Sigun pay iti source ti bombo Radyo, sinukimat ti maysa a komite iti barangay ti lugar a paglaklakuan iti compost dagiti agrekreklamo ket naduktalan a saan nga umno ti nasao a lugar para iti nadakamat a negosyo.
Malaksid iti daytoy, naibaga nga adda ti nabukel a katulagan iti nagbaetan ti dua nga asosasyon dagiti horse owners iti panakaipaay kadakuada ti livelihood program manipud iti DTI ken opisina ti Mayor a rumbeng a mailako ti mapataudda a compost iti maseknan a kooperatiba.
Naibaga pay a saan laeng a compost manipud iti rugit ti kabalyo ti ilaklako dagiti agrekreklamo no di ket uray dagiti produkto a nagtaud iti dadduma a rehiyon.
Impetteng ti source a sakbay nga impaayan ti CEPMO ken City Planning Office iti clearance ti aplikasyon ti agrekreklamo ket rumbeng sinukimatda nga umuna ti nasao a lugar ken nagalada iti barangay clearance manipud iti luhalhati barangay.
