BAGUIO CITY – Imbinglay ti Igorota office a baro a dadaulo ita ti Regional Highway Patrol Unit (RHPU) – Cordillera dagiti nagduduma a programana bayat ti panangidaulona iti nasao nga ahensia.
Iti eksklusibo a panakiuman ti Bombo Radyo Baguio, kinuna ni PLt.Col. Kimberly Molitas a kangrunaan nga ipaayanna iti atension ti panakaibalanse ti personnel ti yunitda a maiwaras kadagiti innem a probinsia ti rehion.
Kinunana a kurang ti 80 a bilang ita dagiti personnel ti RHPU-Cordillera isut gapuna a nagkiddaw daytoy ti kanayonan nga uppat a personel tapno mabalanse ti pwersada ken saan a makompromiso ti panagserbida iti publiko.
Panggepna met nga isakad ti panakaiyakar sadiay La Trinidad, Benguet ti Regional Office ti RHPU-Cordillera nga adda ita iti siudad ti Baguio.
Inlawlawagna a babaen iti daytoy ket lumaka ti panagparehistro wenno panagturong ti publiko iti opisinada nangruna kadagiti agtaud iti adayo a lugar ditoy rehion.
Tutukan pay ni Molitas ti panakaimuntar dagiti pakdaar kadagiti accident-prone areas iti tulong dagiti lokal a gobierno tapnu adda dagiti agserbi a ballaag kadagiti motorista.
Naituding metlaeng a makipatang daytoy kadagiti nagduduma a lokal a gobyerno, kadagiti personnel ti DPWH, non-government organizations ken kadagiti maseknan nga opisina ken ahensia ti gobierno tapno maipaayan iti panagsanay dagiti motorcyle riders.
Kasaruno daytoy ti naobserbaranda a panagado dagiti agpaparehistro ken agal-ala ti motorsiklo kabayatan ti pandemya.
Ni PLt.Col. Molitas ket tubo ti Kibungan, Benguet ken nagserbi kas dadaulo ti Police Community Relations ti Highway Patrol Group Headquarters sadiay Camp Crame ken kas dadaulo ti Public Information Office ti National Capital Region Police Office.
