BAGUIO CITY – Naduktalanen dagiti operatiba ti PDEA ken PNP dagiti baro a wagas dagiti indibidual a manggangandat a mangiruar iti rehion Cordillera kadagiti naapitda a marijuana.
Iti interview ti Bombo Radyo Baguio, kinuna ni PDEA-Cordillera Regional Director Gil Castro a naapiten dagiti mula a marijuana iti Benguet, Kalinga ken Mountain Province ken dagitoy ket kasapulanen a mairuar iti rehion tapnu mailako kadagiti marijuana users sadiay Region 6, Mindanao, NCR, Calabarzon ken MIMAROPA.
Kinunana a karaman kadagiti naduktalanda a wagas ti panakaibiahe dagitoy babaen kadagiti lugan nga addaan ti permit para iti food pass ken iti online a panakailako ken panakaipatulod dagitoy babaen iti courier services ken parcels a maidalan kadagiti riders.
Impannekkalna a dakkel a banag iti panakaduktal dagiti nasao a wagas dagiti nainget la unay a border control checkpoints iti nagduduma a paset ti rehion, partikular iti Baguio City, Kalinga ken Mountain Province.
Innayonna nga adda ti katulagandan kadagiti courier services para iti panangisayankat dagiti operatiba ti PDEA iti panagsukimat kadagiti padala.
Panggepda pay a kataripnong dagiti riders tapnu maisuro kadagitoy ti panagduktal no ti ibiaheda a kargamento ket naglaon iti iligal a droga.
