BAGUIO CITY – Nakumpiskar dagiti soldado ti nagduduma a war materials manipud iti kampo nga inabandona dagiti kameng ti Communist Party of the Philippines-New People’s Army (CPP-NPA) sadiay Abatan, Hungduan, Ifugao idi Sabado, June 19.
Kalpasan daytoy ti engkwentro iti nagbaetan dagiti kameng ti 54th Infantry Battalion, Philippine Army (PA) ken ti saan pay a nabigbig a bilang dagiti CPP-NPA.
Immuna iti daytoy, nagresponde dagiti soldado iti naawatda nga impormasyon mainaig iti presensiya ti CPP-NPA sadiay Abatan, Hungduan.
Nupay kasta, idi nakadanunda iti nasao a lugar ket pinalpaltogan dagitoy dagiti rebelde a nagresulta iti panagrinnupakda a nagpaut iti 30 a minutos agingga a nagsanod dagiti rebelde.
Narekober iti lugar ti maysa nga M16 rifle, dua nga improvised explosive devices, nagduduma a subversive documents, medical supplies ken dadduma a personal a kagawaan.
Dinayaw met ni MGen. Laurence Mina, Commander ti 5th Infantry Division, PA, ti tropa ti 54IB, PA ken pinagyamanan na dagiti maseknan a nangipaay iti impormasyon.
Immunan nga inkari ti provincial government ti Ifugao ti panakagibus ti local communist armed conflict babaen iti panangideklarada iti CPP-NPA-NDF kas persona-non-grata.
