Nasayaat ken naurnos ti pannakaiwaras dagiti nagduduma nga agas manipud Baguio City Health Services Office kadagiti nagduduma a babbarangay iti siudad.
Iti pannakiuman ti Bombo Radyo Baguio kenni Dr. Celia Flor Brillantes, City Health Services Officer, impakaammona a properly dispensed dagiti ag-agas kadagiti health centers iti siudad.
Sigun kenkuana, strikto nga ob-obserbaranda ti pangawat kadagiti agas a bumayag ti 18 a bulan manipud iti panangawatda kadagitoy manipud iti Department of Health.
Inlawlawagna ni Dr. Brillantes nga iti uneg ti 18 a bulan, kasapulan a maiwaras ken mausar dagiti agas ken bakuna tapno maliklikan ti pannakadadael dagitoy.
Inaklonna nga adda dagiti gundaway a mang-awatda kadagiti agas a bumayag laeng iti inem a bulan ngem kinunana a dagitoy ket dagiti agas a sigurado a maiwarasda a dagdagus.
Impasigurado met ni Dr. Brillantes a kompleto ken libre dagiti agas ken serbisyo ti City Health Services Office nangruna dagiti kontra Tuberculosis gapu ta puntiryada a mapababa ti kaso ti nasao a sakit iti siudad.
Impakaammo pay ni Dr. Brillantes a tuloy-tuloy ti serbisyo ken panangiwarasda kadagiti agas kontra iti hypertension, diabetes, tuberculosis, HIV ken dadduma pay.
Kasapulan laeng a mapan dagiti residente nga agkasapulan kadagiti health centers tapno maikkan dagitoy iti naan-annay nga instruction. | via Bombo Karen Sapirao
