Agtitinnulong ti Bureau of Internal Revenue (BIR), Department of Information and Communication Technology (DICT), anti-cybercrime law enforcement units ken dadduma pay nga ahensiya para iti imbestigasyon seknan iti BIR data leak.
Sigun iti BIR, ammoda ti report seknan iti “BIR data leak” nga agwar-waras iti online.
Saanen nga impaay ti taxman ti detalyado ken pakabuklan a datos ti ahensiya a maatap nagwaras.
Iti baet dayta, impanamnama ti ahensiya nga ipangpangrunada ti nasao a pakaseknan.
Innayon daytoy a saan a naapektaran ti taxpayer information ken core BIR systems.
Maipalagip nga idi Setiembre 8, nakapasar ti BIR website iti “brief defacement incident.”
Nupay kasta, na-restore ti website services babaen kadagiti Technical teams ti BIR ken DICT.
Napasamak ti “BIR data leak”, makalawas ti napalabas kalpasan a nakapasar iti “cybersecurity incident” ti St. Luke’s Medical Center.
Malaksid iti dayta, na-hack metlaeng ti website ti House of Representatives idi Hunio 2026.
Sigun iti National Bureau of Investigation (NBI), nabigbigen dagiti indibidual nga adda iti likudan ti hacking kadagiti sumagmamano a websites ti gobierno.
