Mangisayangkat ti aktibidad ti tunggal mosque iti Baguio-Benguet Muslim Association kagiddan ti panagrugi ti Ramadan ita a tawen.
Iti panakiuman ti Bombo Radyo kenni Imam Samsodin Monib, Presidente ti nasao nga organisasyon, inaldaw a mangisayangkat dagitoy ti “Iftar Saem” tunggal alas kuatro wenno alas singko ti malem iti paset ti Malcolm Square nu sadino maaddaanda ti gundaway a mangan sakbay nga ipatungpalda ti espesyal a klase ti misa bayat ti bulan ti Ramadan.
Sigun kenni Monib, adda ti maangay a Grand Iftar inton Marso a kinse nu sadino mabalin a dar-ayan daytoy ti agingga uppat a gasut agingga innem a gasut a muslim.
Kagiddan dayta, mapalpalagipan dagiti sumagmamano a muslim nga addaan ti negosyo wenno trabaho a mabalin a makaapektar iti panag-ayuno dagitoy a liklikan wenno isardengda paylaeng ita a bulan ti Ramadan.
Innayon ni Monib a napateg ti panagtulnog iti nakalanad iti nasantoan a libro dagiti muslim nu sadino obligasyon dagitoy ti agayuno tunggal madanon ti nasao a bulan.
Kabayatanna, dumanonen iti 25,000 agingga 30,000 ti populasyon ti muslim iti probinsya ti Benguet, bayat a dumanon met iti 10,000 agingga 12,000 ti populasyon dagitoy iti Baguio City.//Rob
