BAGUIO CITY – Maisagsaganan dagiti aktibidad para iti ‘First International Baguio Arts and Creative Festival’ a maangay inton Nobyembre.
Sigun kenni Engr. Evelyn Cayat, dadaulo ti City Planning and Development Office, idauluan daytoy ti Department of Tourism – Cordillera iti koordinasyon ti lokal a gobyerno ti Baguio, ti akademya, Design Center of the Philippines – Department of Trade and Industry ken ti City Creative Council.
Kinunana a maisayangkat ti pestibidad iti nagduduma a disso iti siudad kas iti Camp John Hay, Burnham Park, Malcolm Square, Museo Kordilyera, Ili-lika Artists’ Village, Tam-awan Village ken dadduma pay.
Paset daytoy ti panakaideklara ti Baguio City kas maysa kadagiti UNESCO Creative Cities Network iti tay-ak ti crafts and folk art.
