Impablaak ti National Historical Commission of the Philippines (NHCP) dagiti aktibidad kas pananglagip ti Rizal Day inton Disiembre a trenta, a mangmarka ti maika-sangagasut dua pulo ket walo a death anniversary ni Gat Jose Rizal.
Guyguyuguyen ti National Historical Commission of the Philippines (NHCP) ti publiko a makipaset iti tallo a programa.
Umuna ti Nationwide Flag-Raising and Wreath-Laying Ceremonies, nu sadinno maangay daytoy iti Rizal Park idiay Manila, iti Rizal Shrine idiay Calamba, ken ti Rizal Shrine idiay Dapitan City.
Maikadua ket ti “exhibit” a “Remembering Rizal in Artworks and Monuments,” nu sadinno daytoy ket maangay iti National Historical Commission of the Philippines (NHCP) Central Office idiay Ermita, Manila, bayat a ti maikatlo ket ti workshop ken exhibit a maawagan a “Hagod Rizal.” Daytoy ket “commemorative exhibit” ken “portraiture workshop” iti Museo ni Jose Rizal idiay Fort Santiago, Intramuros, Manila.
Kidkiddawen ti National Historical Commission of the Philippines (NHCP) dagiti lokal a gobierno iti Pilipinas a mang-organisar ken makipaset iti panagrambak ti nasao a selebrasion.
Kabayatanna, impakaamo ti National Museum nga ipakitada ti Sleeping Josephine,” maysa nga eskultura ti asawa ni Jose Rizal a ni Josephine Bracken idiay National Museum of Fine Arts.
Orihinal a naideklara ti Rizal Day a National Day of Mourning idi 1898 iti sigud a President Emilio Aguinaldo a mangpadayaw iti pannakapapatay ni Rizal idi Disiembre 30, 1896, idiay Rizal Park iti Manila.