BAGUIO CITY – Naideklara ti entero a bulan ti Nobyembre kas “Ibagiw Creative City Festival Month” ti Baguio City.
Nailanad iti pammilin ni Mayor Benjamin Magalong a babaen iti pestibidad ket maparegta ken maipakita ti kinatibker ti arts ken ti komunidad ti Baguio iti baet ti pangta ti agdama a pandemya.
Kidkiddawenna met ti panangsuportar ti publiko kadagiti naisagana nga aktibidad para iti makabulan a pestibidad nga inorganisa ti Council for Baguio Creative City, Baguio Arts and Crafts Collectives Incorporated ken ti lokal a gobyerno ti Baguio.
Dinakamatna a rambakan ti pestibidad ita a tawen ti kinatibker dagiti umili ti Baguio, nangruna dagiti artists ken artisans ti siudad.
Tarigagayna a maipakita iti amin a napintas ti panagbangon ti Baguio ken mabalinen a maituloy dagiti aktibidad a mangbiag iti ekonomiya ken mangisubli iti panggedan ken pagbiagan dagiti umili.
Mangrugi ti Ibagiw Festival inton November 6 ken agleppas inton November 30 iti sidong ti regulated health ken safety protocols a pakaitampokan ti contemporary arts exhibit a pakaiparangan dagiti aramid dagiti local visual artists ken artisans, woodcarving competition, creative and garden competition ken limitado a guided tours.
Ti tema ti pestibidad ita a tawen ket “Ibagiw 3rd Baguio Creative Festival: Angat Baguio Rising together through Creative Resiliency, Sustainability and Innovation.”
