BAGUIO CITY–Nagduduma ti aktibidad ti Baguio City Jail – Female Dormitory para iti panakarambak ti Women’s Month ita a bulan.
Iti interview ti Bombo Radyo Baguio kenni Jail Inspector Lilian Banda, OIC Jail Warden ti nasao a pagbaludan, kinunana a malaksid kadagiti regular a programada ket adda dagiti espesyal a programa nga isaysayangkatda para kadagiti babbai a balud ken kadagiti personnel nga agbambantay kadagitoy.
Dinakamatna a narugian ti selebrasyonda iti Women’s Month babaen iti simple a seremonya ken iti agdama ket manarimaan paylaeng ti indoor games a sarunuen to ti Tula ni Juana ken ti coronation night ti Search for Miss Wonder Juana inton tapos.
Kinunana a malaksid kadagitoy ket adda latta ti skills enhancement trainings kadagiti personnel ken kadagiti balud, webinars seknan iti women’s emplowement ken virtual kantata competition.
Innayonna a tapnu masalwadan ti salun-at dagiti personnel ti baludan ken dagiti balud sadiay ket adda ti ‘belly good program’ para kadagiti obese ken overweight malakid pay iti kanayon a panag-ehersisyo ken lecture no kasano nga agdieta ken maaddaan iti nasalun-at a panagbiag.
Agtultuloy metlaeng ti panangital-oda iti produkto dagiti balud sadiay babaen iti social media .
Kabayatanna, impannakkel ni Insp. Banda nga agingga ita ket COVID-19 free ti Baguio City Jail – Female Dorm nangruna ta sakbay a maiserrek ken mairuar iti pagbaludan ti maseknan nga indibidual ket maipasidong daytoy iti swab testing.
Iti agdama, dumanon iti 79 a balud a babbai ti adda iti nasao a pagbaludan.
