BAGUIO CITY – Agsagsaganan ti City Tourism and Special Events Office para kadagiti kangrunaan nga aktibidad ti Panagbenga 2018 ken iti mapaspasungadan a 2018 Summer Vacation (Sumvac) ditoy siudad ti Baguio.
Iti panakiyuman ti Bombo Radyo kenni City Tourism Officer Jose Maria Rivera, kinunana a malaksid kadagiti nakapila a regular nga aktibidad ti siudad ket adda met dagiti sumagmamano nga isimsimpada para iti sports tourism.
Sigun kenkuana, ti panawen ti summer ket panawen dagiti outdoor activities wenno aktibidad iti ruar dagiti pagtaengan.
Kabayatanna, dinakamat ni Rivera nga agpaut agingga inton Mayo ti panagtalinaed dagiti adu a turista ditoy lokalidad.
Naamuan kenkuana nga iti datus ti opisinada ket mangrugi iti bulan ti Pebrero ti panagadu dagiti turista ditoy siudad ken agpaut dagitoy agingga iti panagleppas ti SumVac inton Mayo.
Kabayatanna, agtultuloy ti panangipatungpalda kadagiti programa para iti panakapasayaat dagiti tourism frontliners iti siudad ti Baguio.
Kinuna ni Rivera a tinawen nga adda ti pa-seminar para kadagiti nasao a frontliners.
Dinakamatna a maipaspasidong dagiti maseknan iti orientation seknan iti pakasaritaan ti siudad, maipaayan dagitoy iti kopya dagiti tourist spots ken maiyunay-unay kadagitoy ti kinapateg ti hygiene ken Good Manners and Right Conduct.
Inaklonna met nga adda dagiti reklamo a maaw-awatda kontra kadagiti sumagmamano a tourism frontliners ti siudad nangruna ta saan a regulated ti nasao a sektor ti industriya ti turismo.
Nupay kasta, impanamnama ni Rivera a narisut dagitoy.
