Mangisaysayangkat iti nagduduma a promotional activities ti Department of Tourism-Cordillera tapno maguyugoy ti ad-adu pay a gangganaet a turista iti rehion.
Sigun kenni Jovita Ganongan, regional director of the DOT-CAR, aktibo a makipaspaset ti DOT-CAR kadagiti lokal ken international a travel fair tapno maitandudo ti kinapintas ken naidumduma nga idiadiaya ti turismo iti Cordillera.
Karaman kadagiti tampok a pagpasyaran iti rehion ti cultural ken heritage tourism, farm-to-table experiences, wellness tourism, weaving, mountain adventures, sports activities, ken golf tourism.
Maibasar iti listaan iti DOT-CAR, immuna dagiti Amerikano kadagiti bilang a ganggannaet a turista a sumarsarungkar iti Cordillera, kasaruno dagiti Pranses, Koreano, Canadian, ken Japanese.
Dumanon iti nasurok 1.5 milion a lokal a turista ken dandani 54,000 gangganaet a turista ti dimteng iti rehion idi tawen 2025. Kabayatanna, dumanon iti 6.7 milion same-day tourists met ti nailista idi napalabas a tawen, kaaduan ket simarungkar iti siudad ti Baguio.
Kinuna metlaeng ni Ganongan nga agtultuloy a mapapapaigsa dagiti lokal a gobierno ti promosion iti bukodda a destinasion tapno maguyugoy pay ti ad-adu a turista.
