BAGUIO CITY – Maituloy manen dagiti dadakkel a proyekto para iti imprastraktura ti lokal a gobierno ti Baguio City iti baet ti agdama a pandemya.
Sigun kenni City Administrator Bonifacio Dela Peña, nasken a saan nga agbalin a lapped ti agdama a pandemya iti panakaituloy dagiti nagduduma a proyekto para iti pagsayaatan ti siudad.
Dinakamatna a gapu iti daytoy ket naipaayen ti kontrata para iti rehabilitasyon ti drainage system manipud Lake Drive, Burnham Park agingga Magsaysay Avenue nga aggatad ti P100-M ken maituloy ti proyekto apaman a sumangpet iti siudad dagiti naangkat a materyales.
Innayonna nga inton sumaruno a bulan ket mai-award ti kontrata para iti konstruksion ti youth convergence center and sports complex sadiay Athletic Bowl nga aggatad ti P434-M.
Impannakkelna a manarimaanen ti panakanayon dagiti bleachers ti Athletic Bowl ken ti panakaaramid ti paradaan iti uneg ti pasilidad nga aglaon ti dumanon 200 a lugan.
Maisimsimpa payen ti konstruksion ti dua a barangay halls nga aggatad ti P56-M ken P37-M.
Mangnamnama ti lokal a gobyerno ti Baguio a malpas dagiti nasao a proyekto inton 2022.
