BAGUIO CITY – Nailista ti siudad ti Baguio ti kaaduan a reklamo iti Office of the President babaen iti 8888 Hotline sipod opisyal a naglukat daytoy idi Agosto agingga iti bulan ti Disyembre idi napalabas a tawen.
Sigun kenni Civil Service Commision- Cordillera Regional Director Marilyn Taldo, manipod iti walopulo ket pito a pakabuklan a reklamo iti rehion ket kangrunaan a mairekreklamo dagiti nagduduma nga ahensia ken opisina iti lokal a gobierno ti Baguio.
Karaman kadagiti mairekreklamo nga opisina ti City Building and Architecture’s Office, City Engineering Office, ken ti opisina dagiti naduduma a barangay, maysa a branch ti Regional Trial Court ken ti Social Security System-Baguio Office.
Kangrunaan met a rason iti reklamo dagiti umili ken kliente ti nabontog a “proccesing time, non-action on claims ken ti nabuntog a panakaiproseso dagiti babayadan.
Mainaig iti daytoy, impanamnama ti opisial a maipaayan iti aksion dagiti nasao a reklamo ken posible a mapatawan iti kaskenan a pannusa dagiti maseknan iti kanito a mapaneknekan a naglabsing dagitoy.
