BAGUIO CITY – Rugrugian paylaeng Municipal Tourism Office ti La Trinidad, Benguet ti in-inot manen ti panangital-oda kadagiti mabalin a pagpasyaran dagiti umili ken turista sadiay.
Iti panaki-uman ti Bombo Radyo Baguio, inaklon ni Valred Olsim, dadaulo ti nasao nga opisina a saan a napintas ti nagbalin a reaksion dagiti umili idi intaltal-oda dagiti pagpasyaran sadiay kagiddan ti manarimaan a pandemya.
Kinunana a daytoy paylaeng ti risutenda ita babaen iti panangkumbinsirda kadagiti tattao ken iti panangilawlawagda kadagitoy nga addan ti lokalidad iti dalan paturong iti panagrekober.
Impettengna a maysa a wagas tapnu makarekober iti nagbalin nga epekto ti pandemya nangruna iti ekonomiya ket ti turismo gaputa no dumur-as ti turismo ket dakkel ti agbalin nga epekto daytoy iti dadduma a sektor ken iti biag dagiti umili.
Imbinglay pay ni Olsim a saan laeng a ti panakaital-o dagiti tourism sites ti naksayan idi napalabas a dua a tawen ngem ketdi, uray pay ti skills dagiti tour guide sadiay.
Dinakamatna a kabayatan ti pandemya ket nagsukat dagitoy ti trabaho kagiddan ti panagsardeng met ti operasyon dagiti tour operators ken tourist sites.
Pagyamyamananna met dagiti addang ti dadduma a tourist sites a nagresulta iti panakaguyugoy dagiti turista nga agturong kadagitoy.
