BAGUIO CITY–Naragsakan dagiti nagannak dagiti nagturpos a kadete manipud iti probinsya ti Mt. Province ken Ifugao.
Iti panakiyuman ti Bombo Radyo kenni Soling Galong, maysa a manursuro ken ina ti agturpos a ni Cadete 1st Class Joshua Galong, nagasat ti anakna gaputa nagun-odna ti arapaap ti amana nga agturpos iti Phiippine Military Academy.
Ni Cadete 1st Class Joshua Galong ket karaman kadagiti agturpos iti Mandirigma ng Bayan, Iaalay ang Sarili, Lakas at Tapang, Para sa Kapayapaan (MABALASIK) Class of 2019.
Sigun iti ina daytoy, nasukatan ti nagbanuganna iti las-ud ti uppat a tawen.
Maipalagip a ti ama ni Galong ket cancer survivor ket arapaapna a sumrek ti anakna iti nasao nga akademya.
Impeksana a saan nga agbuteng iti nagturungan ti anakna ken ti namarsua laeng ti pagkamanganda.
Kabayatanna, sigun met kenni Corazon Guillermo, maysa a manursuro, nalaos ti ragsakna iti panagturpos ti dua nga anakna ita nga aldaw iti agpada nga akademya.
Imbinglayna a nagbalin nga inspirasyon ti dua nga anakna nga agimet wenno ag-iggem ti paltog sipud pay ubbing dagitoy.
Malaksid iti daytoy, saan a rasun ti kinakurapay wenno rigat iti biyag tapno lapdan dagiti tarigagay wenno arapaap ti anakna.
Kinunana a kas maysa nga ina ket nalaos ti panagdanagna kadagiti anakna ngem ti laeng kired ken bendisyon ti namarsua ti kasapualan.
