BAGUIO CITY – Pormalen a naipila ti nagtutuon a kaso kontra kadagiti suspek iti maatap a panakapapatay ti maysa a 7-anyos nga ubing ditoy Baguio City.
Indauluan ti investigation team ken legal officer ti Baguio City Police Office ti panakaipila dagiti nasao a kaso iti City Prosecutor’s Office idi malem kalman kalpasan ti nainget nga imbestigasyon ken kadagiti nakolektar nga ebidensya ken salaysay dagiti testigo a namalmaltrato ken nabekkel ti ubing a nagresulta ti ipupusay daytoy idi May 30.
Sumangsango ita iti kaso a murder ken panaglabsing iti RA 7610 wenno iti Special Protection of Children Against Abuse, Exploitation and Discrimination Act ti agasawa a Loly Ann Duccog Dalipog ken Efren Uyammi Dalipog nga agserserbi a guardians ti ubing.
Naipila metlaeng ti kaso nga obstruction of justice kontra iti agasawa a Dalipog ken da Wenzel Duccog ken Marcelino Walang.
Sumango metlaeng iti kaso a panaglabsing iti Bayanihan to Heal as One Act da Loly Ann Dalipog, Wenzel Duccog ken Marcelino Walang gapu iti panangiyawidda iti bangkay ti ubing sadiay Banawe, Ifugao nga awanan ti travel authority iti baet ti manarimaan a community quarantine.
Maipalagip nga inreport dagiti guardians ti ubing a nagkettel daytoy iti bukodna a biag babaen iti panagsab-itna babaen iti knitted scarf a naitali iti tawa ngem iti panagimbestigar dagiti pulis ket naduktalan a pimmusay ti ubing gapu iti panakabekkelna.
