BAGUIO CITY – Posible a maipilaan ti nagtutuon a kaso ti Project Developer sadiay Upper Cogcoga ken Piripin Bato kasaruno ti panakalayos manen iti kalsada iti nagbeddengan ti Kilometer 3 ken Kilometer 4 sadiay La Trinidad, Benguet iti panagdalapos ti bagyo a Maring.
Iti panakiuman ti Bombo Radyo Baguio, kinuna ti mayor ti ili nga iti inisyal nga inspeksion ti Municipal Engineering Office ken ti DPWH ket naduktalan a naitultuloy latta ti proyekto iti nasao a disso.
Naduktalan pay nga awan latta ti inaramid ti developer a mitigating measures kas iti inkarida kadagiti otoridad sadiay idi immuna a panakapasamak ti layos idi nepnep.
Dinakamatna nga ad-adda nga immadu ti pitak ken dadakkel a bato a naiyanod iti kalsada isut gapuna a nakarkaru a layos a napasamak gapu iti panakapullat ti kanal ti nasao a kalsada.
Gapu iti daytoy, nagsuratda metten kadagiti maseknan nga ahensia ti gobyerno tapnu maisayangkat manen ti panagsukimat iti patrabaho inton bigat tapnu maamuan no anya dagiti kaso a nasken a maipila kontra iti developer ti nasao a proyekto.
Maipalagip nga immunan a napilaan ti criminal ken civil cases ti nasao a developer, pakairamanan ti environmental case gapu kadagiti panaglabsing ti proyekto dagitoy.
Imbinglay pay ti mayor a mangipila metlaeng dagiti maseknan nga ahensia ti gobyerno iti kaskenan a kaso kontra iti developer gapu kadagiti dadael nga intunda ti napasamak a panaglayos.
Innayonna a mabalin met a mangipila dagiti maseknan nga umili iti kaso kontra iti developer gapu iti napasaranda a dadael iti nasao a panaglayos.
Impetteng ti mayor a saanda a kayat a maulit manen ti nasao nga insidente isut gapuna a pappapartaken ti lokal a gobyerno ti panagtulid ti kaso kontra iti developer tapnu marisuten ti nasao a parikut. (- report from Bombo Janice Juanito)
