BAGUIO CITY – Dinayaw ti COMELEC-Kalinga ti naidumduma a wagas ti panagkampanya dagiti kandidato sadiay Balbalan, Kalinga.
Sigun ken Provincial Election Supervisor Atty. Elenita Capuyan, maragsakan daytoy iti natalna a panagkampanya iti nasao a municipio gaputa agkakadwa amin dagiti kandidato iti panagturongda kadagiti babbarangay.
Kinunana a pamaneknek daytoy a raraemen latta dagiti kandidato dagiti kaballubalda para iti maymaysa a panggep a maliklikan ti riribuk ken panakapasamak ti aniaman nga insidente.
Mangnamnama ni Capuyan nga ipatungpal metlaeng dagiti daduma a kandidato iti Cordillera ti maaw-awagan nga “sportmanship” a maob-obserbaran ita sadiay Balbalan, Kalinga.
Sigun pay ken Capuyan, adayo a nataltalna ken nainot ti panagkampanya dagiti kandidato ita a tawen no idilig kadagiti naglabas a tawen.
Dinakamatna a saan unay nga aggastar dagiti kandidato iti campaign materials, rally, motorcade ken daduma pay nga aktibidad nga agkasapulan ti dakkel a pundo gaputa kadawyan ita a maipatpatungpal ti online campaigning.
Imbinglay pay ni Capuyan nga iti agdama ket ti laeng mayor ti Rizal ti mabigbigbig kas unopposed candidate iti entero a probinsia ti Kalinga.
