Agtultuloy a mapaspasaran dagiti motorista ti nailet a gunay ti trapiko iti Baguio City nangrun kadagiti napalpalabas nga aldaw gapu iti nagsasaruno nga aktibidad kagiddaan ti umadanin a paskua.
Iti panakiyuman ti Bombo Radyo kenni PLT. Colonel Zacharias Dausen, Baguio Traffic Enforcement Unit, kinunana a maysa pay a rason iti nailet a gunay ti trapiko ket ti panagturong dagiti turista kadagiti nagduduma a tourist spot iti siyudad.
Sigun kenni Dausen, nangideployda ti kanayunan a pwersa ti pulis a mangmonitor iti kalsada nangruna iti luglugar a mabigbig kas bottleneck ti trapiko.
Daytoy ket pakairamanan dagiti kalsada a paturong iti Igorot Stone kingdom, Lourdes Grotto, Mines view, Christmas village, Botanical Garden ken ti Panagbenga Rotonda paturong idiay Camp John Hay.
Innayon ni Dausen nga adda ti panagngato ti kaso dagiti vehicular traffic accidents iti syudad gapu ta nanayunan dagiti lugan.
Kadawyan a mapaspasamak ti vehicular traffic accidents iti rabii nu sadino, maysa a rason ket ti puyat, impluwensya ti arak, ken overspeeding dagiti motorista.
Kabayatanna, agtaltalinaed a parikut ti panaglagbsing dagiti motorista iti number coding, illegal parking, ken obstruction.//Wilmea Pacpacan
