BAGUIO CITY – Maur-uray laengen ti panangpirma ni Baguio Mayor Benjamin Magalong iti pammilin a nakailanadan dagiti pagaladagan a nainget a maimplementar ken masurot kabayatan ti makabulan a panakaipasidong ti siudad iti General Community Quarantine iti entero a bulan ti Pebrero.
Iti interview ti Bombo Radyo Baguio, kinuna ni City Administrator Bonifacion Dela Peña a kangrunaan ditoy ti panakaituloy ti nainget nga implementasyon ti panagsuot ti face mask ken face shield ken ti social wenno physical distancing.
Dinakamatna a karaman metlaeng ditoy ti posible a panakaipatungpal manen ti alas dies ti rabii agingga alas kwatro ti parbangon a curfew.
Innayonna a maisubli iti 30% capacity dagiti pasdek wenno establishimento, pakairamanan dagiti mass gatherings.
Sigun kenni Engr. Dela Peña, agtalinaed met ti pagalagadan iti transportasyon ngem adda pay ti dua nga aldaw a pawayway tapnu adalenda dagiti dadduma a mabalin a maipatungpal a pagalagadan.
Inkarina pay nga ar-aramidenda ti amin tapnu saan nga agbalin a discriminatory wenno adda ti mailaksid kadagiti pagalagadan a masurot kabayatan ti GCQ.
Inyunay-unayna metlaeng nga uray adda dagiti national guidelines para iti GCQ ket adda met ti bileg ti lokal a gobyerno a mangbukel kadagiti lokal a pagalagadan a nasken a suruten dagiti umili kabayatan ti nasao a klasipikasyon ti community quarantine.
