BAGUIO CITY – Umap-apela kadagiti maseknan nga opisyales ti maysa nga ina nga agkaykaysa dagitoy para iti nainget a kampanya kontra iti iligal a droga kalpasan ti nakaam-ames nga insidente a napagteng ti anak daytoy a pinapatay ti maysa a drug surrenderer.
Segun kenni Nida Calasiao Sabado, 28-anyos ken residente ti Lower Gayasi, Wangal, La Trinidad, Benguet, nasken nga agkaykaysa ti tunggal maysa tapnu mapaksiat ti panagraira ti iligal a droga a mangituntunda laeng iti panakapukaw ti inosente a biag a kas iti anakna a ni Sky Calasiao Sabado nga agtawen laeng iti tallo.
Kiniddawna pay ti panangtutok dagiti maseknan nga opisyales ken pulisya tapnu saan a mabaybay-an ken basta maibasura ti kaso ti suspek a ni Fernand Magastino Calines, 27, ken residente iti nasao a lugar a nangpatay iti anakna.
Maibasar iti salaysay ni Sabado, Disyembre 19 idi nagturong daytoy ken ti anakna sadiay Km. 19, Pasnaan, Ambassador, Tublay, Benguet tapnu makipurdiya.
Kinunana nga iti pangaldaw ket naginana daytoy ken ti anakna iti kalapaw sadiay idi napaliiwna ti maysa a lalaki nga agsirsirip kadakuada.
Killaat a simrek ti lalaki ken pinang-orna ti ulo ni Sabado babaen iti kayo agingga a naglusdoy, ken sadiay nga inarakop daytoy ti anakna nga agsangsangit.
Saan a napnek ti suspek ket binagkatna ti ubing, inigemanna ti saka daytoy ken pabalinswek a pinangpang-orna ti ulo ti ubing sakbay a rimuar iti kalapaw nga imetna ti ubing.
Kinuna ni Sabado a nangegna laengen ti panagsangsangit ti anakna ket daytoy ti nangalaanna iti pigsa a nagkarkaradap, agingga a timmakder ken timmaray tapnu agpaarayat.
Segun kenkuana, adda ti nasabatna a maysa a nakamotorsiklo ket ditoy a nagpaarayat.
Naitaray ni Sabado iti ospital bayat a sinapol dagiti responders ti anakna ngem saanda daytoy a nadanonan iti kalapaw, agingga a nakangegda iti asog manipud iti rangkis ket nakitada ti ubing a kakaasi ti nagbanaganna.
Intarayda daytoy iti Benguet General Hospital sakbay a naiyakar iti Baguio General Hospital and Medical Center ngem daksanggasat ta idi Disyembre 23 ket pimmusay ti ubing.
Dinakamatna met a simmuko ti suspek idi Disyembre 21 babaen iti panangguyugoy kenkuana dagiti kakabagianna ken idi kanikadua ket naipisok iti Benguet Provincial Jail gapu iti kasona a murder ken attempted homicide.
Pinatalgedan met ni PO2 Rommel Simeon, imbestigador ti Tublay Municipal Police Station, a maysa kadagiti drug surrenderer dagitoy ni Calines.
