BAGUIO CITY – Kidkiddawen ti ama ti Benguet ti panagaramid dagiti municipal officials ken dagiti pagadalan iti nainget nga aksion tapnu maksayan dagiti mapaspasamak a panagrames iti masakupan ti probinsia.
Inaramid daytoy ni Governor Crescencio Pacalso kasaruno ti panagngato ti bilang dagiti kaso a panagrames iti dumanon 25 iti umuna nga uppat a bulan ti agdama a tawen iti probinsia manipud iti 19 iti umuna a tallo a bulan ti 2017.
Sigun kenkuana, kasapulan a repasuen manen dagiti amin a mayor dagiti 13 a munisipyo ti Benguet dagiti ordinansa dagitoy, nangruna dagiti mangipawpawil kadagiti pornographic materials wenno dagiti materyales a manguyugoy kadagiti suspek nga ag-rames.
Kinunana a nasken a maaramid amin nga addang tapnu malapdan ti nasao a makapa-alarma a sitwasyon ken tapnu maksayan ti nasao a kaso.
Partikular a dinakamat ti gobernador ti panakaipawil dagiti pornographic materials kadagiti pagadalan ken nasken a masukimat no adda linaon ti cellphone dagiti estudyante iti nasao a banag.
Maibasar iti listaan, kaaduan a kaso ti panagrames ket napasamak sadiay La Trinidad a sinaruno ti Tuba ken Itogon.
Dinakamat met ni Provincial Social Welfare and Development Officer Juana Banawe maysa ti teknolohiya ken ti kaadda dagiti pornographic materials no apay nga adda ti mapaspasamak a panagrames iti probinsia ti Benguet.
