BAGUIO CITY – Mangipatpatungpal ita iti naing-inget nga intelligence investigation ti pulisya ken ti military kadagiti maatap a kameng ti Communist Party of the Philippines ken New People’s Army ditoy rehion Cordillera.
Kasaruno daytoy ti pannakairaman ti pito a Cordilleran iti listaan ti Department of Justice kadagiti maibilbilang a terorista.
Inlawlawag ni Cordillera PNP Regional Director PCSupt. Edward Carranza nga awan pay laeng ti maaramidan dagitoy kontra kadagiti nasao nga indibidual agingga nga awan ti maipaulog a warrant of arrest manipud iti korte.
Nupay kasta, kinunana a nainget ita ti koordinasyonda iti militar tapnu mabigbig dagiti dadduma pay nga indibidual a posible a kameng ti komunista a grupo ken dagiti rebelde.
Maipalagip nga immunan nga indeklara ni President Rodrigo Duterte ti CPP-NPA kas terorista gapu kadagiti kinaranggas ken riribok nga isaysayangkat dagitoy.
